هله گونش چيخماميشدي.اوشاقلار قاچاراق داغ باشينا يئتيشديلر.داغ آغ ؤركونو باشينا تاخیب،دینمز دانیشماز اَيلشميشدي.اوشاقلار آراسيندا اولان بیر قیز اوشاغی داغا اوز توتاراق سؤيلهﺩي:بؤركونو منه بورجوئررسن می؟ داغ سوروشدو:« نه‌يينه لازيمدير؟» قيز جاواب وئردي: «بؤركونو باشيما قوياجاغام، سونرا هئچ كيم مني گؤرمهﻳﻪجك. او واخت ايشيق‌ليق باغينا سئيره گئدهﺟﻪيم.»داغ سوروشدو:«صونرا »،قيز جاواب وئردي:«سيرلر اوتاغينا گئديب و اؤز كيتابيمي اوردا تاپاجاغام.»داغ بيرآز فيكره داليب صونرا دئدي:«ايكي شرط‌له بؤرکومو وئرﻩرم،بيري بودور كي گون باتماميشدان قاباق بؤركومو اؤزومه قايتاراسان ايكينجيسي ده بودوركي اگر بير سيرري بيلدين مني ده خبردار ائدﻩسن.صونرا بؤركونو گؤتوروب قيزا وئردي، قيز بؤركو باشينا قويوب، گؤزلردن ايتدي.
كولك‌له،دنيزلردن و دوزلاق‌لاردان كئچدي و يئددي قاپي‌لي بير قالايا يئتيشدي كي هر بير قاپيدا بير گودوكجو وار ايدي.سونونجو گودوكجو سئحيرلي آچاري قيزا وئردي، او قاپي‌لاري آچدي، آچاري جيبينه قويوب،قالانين ايچينه داخيل اولدو.قالانين ايچينده بير باغ وار ايدي، باغين ايچه‌ریسينه كئچدي.
باغدا ”قوم“يئرينه اولدوز تؤكموشدولر.باغين ايچه‌ریسينده بير كرپيچي گونش نوروندان، او بيري كرپيچي ايسه آي ايشيغيندان اولان بير ائو و اونون قاﭘﻲسيندا دا ايكي زنگ وار ايدي، بيري سيرر، بيري نغمه.قيز بير آز دوردو، نغمهﺳﻴنی سينهﺳﻴﻨﺪه گيزلهﺩركن، ياواشجا سينا سيرر زنگيني چالدي، قاپي آچيلدي.
اوتاق‌لارا فرش‌لر سريلميشدي و اوستونده ناخيشلانميش چيچك‌لر و گول‌لره مين باغين گولو چيچه‌يي ده اونون طراوتينه يئتيشمزدي و مين دنه ده قوش اونون بوداق‌لاريندا نغمه اوخويوردولار.قيزين چوخ كؤنلو ايستهﻳﻴﺮدي كي او باغدان بيرچلنگ قيرميزي گول درسين آمما قورخوردو كي گئجيكسين.
آستا ـ آستا اوتاق‌لاردان كئچدي و بير اوتاغا يئتيشدي كي قاﭘﻲسينا يئددي قيفيل وورموشدولار.بالاجا قيز آچارلاري جيبيندن چيخارديب قيفيلﻻري آچاراق اوتاغا گيردي سئوينجيندن قيشقيردي.او اوتاقدا،بوتون دونيا اوشاق‌لارينا گؤره كيتاب وار ايدي .قيز ، اؤز ايستهﺩييي كيتابي تاپماق اوچون كيتاب قفسهﺳﻲنين قاباغيندان كئچدي.
گزدي… گزدي… گؤزو بيردن اوتاغين كونجونده اولان بؤيوك بير كيتابا ساتاشدي و اونا طرف گئتدي،كيتابين اوستونده بئله يازميشديلار سيرلر كيتابی قيز كيتابي واراقلادي، بيرينجي صحيفهﺳﻴﻨﺪه گؤزو بير خريطهﻳﻪ ساتاشدي.خریطه، ظولمتدن چيخيش يولونو و ايشيق زيروﻩسينه چاتماغي گؤستريردي.صونرا كي صحيفهﺩه «آيدان نپتونا »گئتمهﻳﻴﻦ كسه يولونو نيشان وئريردي و زؤهره آدلي گيزلين اولان چايين اوستونه نيشان قويموشدولار.
قئزكيتابي واراقلادي. كيتابين اورتا صحيفهﻟﺮيندﻩ ايسه خستهﻟﻴﻜﺪن و اونون درماني حاقدا بير پارا شئي‌لر يازميشديلار.بو خستهﻟﻴﻚ آراسيندا نادان‌ليق خسته لييي و اونون درماني حاقدا دا سؤزلر يازيلميشدي، قيز دوداق آلتي دئدي:«نه ياخشي،كيتابي اؤزوم‌له آپاريم » آمما كيتاب، او قدر آغير ايدي كي هر نه قدر چاليشدي اونو قالخيزا بيلمهﺩي.پئنجرﻩدن چؤله باخدي،گون باتماق ايستهﻳﻴﺮدي .
قيز ایسه گلدييي يوللاري قاییتمالی ایدی.قيز يوبانيردي و داغ اينتيظار چكيردي كي بؤركونو گون باتماميشدان قاباق آلسين.بيرده سورعت‌له كيتابي واراقلادي و اونون صون صحيفه ﺳﻴﻨﺪه اوخودو كي:«صاباح اوشاقلاريندير و بير اوشاق كي بو سيري بيله قارانليقدان قورخماياجاق»كيتابي بوشلادي و حسرت‌له باغدان چيخيب يئلين بئلينه مينيب قاييتدي، اوشاقلار داغين دؤشونده اونون يولونو گؤزلهﻳﻴﺮديلر.
قيز داغا سالام وئريب و اونون بؤركونو قايتاردي، داغ گولومسهﻳﻴﺐدئدي:«سفر خوش كئچديمي؟ اؤزونله نه گتيريبسنﻣﯽ؟»قيز سئوينجك حالدا دئدي: « چوخ يئكه بير كيتاب وار ايدي بلکه ده سن بؤيوك‌لوكده، اوندا چوخ شئي‌لر يازيلميشدي.ايستهﺩيم اونو اؤزوم‌له گتيرم ائلهﻳﻪ بيلمهﺩيم.»داغ سوروشدو:«ياخشي، اوندا نه‌لر يازيلميشدي؟»
قیز فيكيرلشدي و دئدي :آخير صحيفهﺳﻴﻨﺪه بئله يازيلميشدي:«صاباح اوشاقلاريندير»داغ كدرلندي و باشيني آشاغي سالدي.آمما آزصونرا باشيني قالديريب بئله دئدي:«ياخشي كئچميش داغ‌لارين، دوزلرين و دنيزلرين ايدي، قوی گلهﺟﻜﺪه اوشاق‌لارين اولسون».
هیچ نظری موجود نیست:
ارسال یک نظر